Sanguinis circuitio, et in orbem per vasa omnia circumductio, otiosarum mentium partus, mera nubes est, quam amplexantur Ixiones, Centauros et portenta procreaturi : Mirum quippe quantum hoc uno figmento universa viventium corporum Oeconomia obscuretur, perturbetur, quam artis Medicæ fundamenta misere convellantur : Quam Medicus principum præsidorum subsidiis destitutus, inutilis sit, et feriatus afflictæ opemque implorantis Naturæ spectator, quantum vel prudenti illorum usu mali importet. Non desunt tamen qui tam futili opinione delectati, ad eam tanquam ad saxum pertinaciter adhærescant, cæcitatisque antiquitatem insimulent. Qui si ad aspiciendam lucem oculos tantisper aperiant, facillime eum errorem, quem rei novitas attulit, Naturæ ratione depellent.