Ms BIU Santé no 2007, fo 71 vo.
Clarissimo viro D.D. Christiano Utenbogardo, Med. Doct. Utrechtum.
Vivo et valeo, vir præstantissime ; de Te idem voveo, et spero. Quomodo
se habent populares tui, vir doctissimus Scoockius, et Theologicus
ille rabula Voetius ? Hîc habeo librum ante 7. annos editum apud vos, quem certè
magnifacio, utpote qui à bonis omnibus laudem meretur : Sunt Ant. Æmilij
Orationes, etc. Audio illum Scriptorem apud vos manere : si Tibi amicus
fuerit, fac quæso ut intelligat ejus scripta mihi esse carissima, et ejus Orationes
pene totas legisse : eúmq. ideo nomine meo salutabis. Voetius vester quid novi
molitur ? an de tertio tomo cogitat Disput. Theologicarum ? Rex noster
Christianissimus continua synocho putri laboravit, ad Iccium portum, à
(Caletum dicunt,) à qua tandem feliciter liberatus est per octies missum
sanguinem, et aliquoties repurgatum corpus. Hîc brevi futurus est, ut vires
resumat in natali solo, et morbi reliquias deponat in cælo aere temperato. Vale
carum caput, et me quod hactenus fecisti, amare perge. Parisijs, 26. Iulij, 1658.
Tuus ex animo Guido Patin.
