Ms BIU Santé no 2007, fo 108 vo.
Rex noster ridet ac exultat, nec nisi ludit, dum novum Tribunal ab ipso
institutum quotidie versatur instruenda lite Nic.Fouquet, et multorum
publicanorum incarceratorum : unde manabunt multæ lacrymæ, in pluribus
familijs : interea v. magnis sumptib. Regis, Principum et aliorum Procerum,
instituuntur equestres ludi, statim magna pompa celebrandi : nulla
habita ratione caritatis annonæ, quæ hîc maxima est, summo multorum dolore
atque incommodo. Sic vita truditur Regum et mendicorum. Sed profectò, res
est non satis sobria, lascivire devorato orbe terrarum, ac exhausto per vecti-
galia immodica, dum tot Christiani mala miseráque fame et misere miserrimè pereunt. Plura scriberem
nisi publicus dolor vetaret, et calamitates publicæ me privatim afficerent ;
ne dicam interficerent, aut saltem à bona mente et quieto rerum mearum
statu turpiter averterent. Vale, vir præstantissime, vive, fave, ac
me quod facis, amare perge. Parisijs, die Martis, 6. Iunij, 1662.
Tuus ex animo Guido Patin.
