Ms BIU Santé no 2007, fo 229 vo.
Cl. viro D. Guern. Rolfincio, Med. Doctori, Ienam.
Gratissimum mihi fuit, Vir Cl. ex tua discere quod vivas et
in illo tuo erga nos amore constanter perseveres : Fidelis amicus medicamentum vitæ.
Quæ antehac à me accepisti, tam levia sunt ut tua gratiarum actione planè indigna
mihi videantur : nec enim sunt tanti munuscula nostra chartacea, ut gratiosum atque
beneficum tuum animum tantopere demittant. Cl. viri Casp. Hofmanni, Amici olim
nostri, Apologiam pro Galeno, in lucem emisi : Aliquot ejus Exemplaria misi Noribergam
ad Cl. Volcamerum, unde unum ad Te transibit, alterum ad Cl. virum D. Io. Theod.
Schenkium, doctissimum Collegam tuum, quem saluto. Quod spectat ad Chirurgiam
illam Gallicam P. Ægineta, ex Iac. Dalecampij, Medici Lugd. versione, et commenta-
rijs Sim. Pietrei, eruditissimi Doct. Med. Paris. eam Tibi promitto, fuit enim mihi ab
aliquot mensibus restituta, eámq. prima occasione mittam ad D. Volcamerum. Vale
Vir Cl. et me amare perge, qui omnia fausta Tibi apprecor. Parisijs, 28. Febr. 1669. G.P.
