Ms BIU Santé no 2007, fo 193 vo.
Cl. viro D. Burcardo, Med. Doctori, Basileam.
Hoc unum raptim ad Te scribo, Vir Cl. Senator ille Paris. Dominus de
Salo, à quo Rex noster abstraxit suum Privilegium, pro singulis hebdomadis
componendo judicio de Libris nuper editis, sub hoc lemnate, le Iournal des
Sçavans ; quod hîc viguit per tres menses ; non potuit in gratiam redire cum
Rege : adversus eum stant et nituntur ipse Papa, Legatus Papæ, Loyoli[tæ]
(nigra cohors, quorum, quidquid non dicitur, Ars est.)
et alij Monachi, qui volunt à singulis hanc sibi veniam dari, ut de omnibus
judicent, et à nemine judicari : sperat ille Senator hyeme proxima se
id effecturum, ut istud officij genus, eámq. potentiam tandem recuperet :
quod si contingat, de eo Te monebo, ut decernas quod volueris. Interea Te quo[que]
rogatum velim, ut amicis nostris omnibus me commendes, præsertim Dominis Chenaur[e,]
Bauhinis, Platero, Glasero, Zwingero, Eglingero, Schrotberg, etc. Parisijs,
die Lunæ, 20. Iulij, 1665.
Tuus ex animo, Guido Patin.
Clarissimo viro D. Gottlieb Breuning.
