Ms BIU Santé no 2007, fo 212 vo.
Cl. Viro D. Georgio Frid. Laurentio, Lubecam.
Librum tuum Nomini meo inscriptum, Vir Cl. cum Epistola tua, ante mense
Iunio scripta, heri tandem accepi : de utroque Tibi maximas ago gratias.
Proximo mense Tibi apparabo fasciculum quem requiris, cum sequ.
nempe Methodo in Aphorismos Mar. Curæi ; et Fr. Pidoux de febre purpur.
Observationes Fernelij numquam fuerunt editæ, et forsan perierunt :
quis eas unquam vidit ? octavus supra centesimum agitur annus ab
excessu Fernelij, an unquam fuerint in natura planè dubito. Orationem
illam quam habui in medio Senatu, et maxima auditorum frequentia,
anno 1647. adv. pharmacopæos nemo unquam vidit, nequidem unquam scripta fuit : fuit
illa extemporalis, sed non sine sale : nebulones istos, Medicorum simias, et
sanctioris Medicinæ pestes apprime novi : nec curo eorum offucias, nec malas
artes aut imposturas eorum quidquam moror : sunt miseri lucriones, etc.
Promisso fasciculo et alia adjungam, si quæ occurant. Interea,
Vir Cl. vale, fave et me ama. Parisijs, 26. Nov. 1666.
